Linda frá Feti kastaði sínu fyrsta folaldi í byrjun júlí. Brúnn hestur undan Frakki frá Laugavöllum varð raunin.

Linda er klárhryssa með þrjár níur. Frakkur stóð sig vel á nýliðnu Landsmóti, 9,03 fyrir hæfileika, þar af tvær 9,5 og fjórar níur.

Hugmynd frá Sauðárkróki er 5 vetra hryssa sem við eigum og höfum mikla trú á. Hún er undan gæðingnum Hætti frá Þúfu sem hlaut 8,68 í aðaleinkunn í kynbótadómi í vor. Móðir Hugmyndar er Otursdóttirin Viðja frá Sauðárkróki sem fékk á sínum tíma 8,5 fyrir tölt, brokk, skeið og vilja. Við stefnum með Hugmynd í dóm á næsta ári. 

Hugmynd og Hannes í túninu á Hamarsey.

Hrund frá Árbæ, 1. verðlauna Keilisdóttir, kastaði í gær, á kvenréttindadaginn 19. júní hverju öðru nema bleikálóttri hryssu undan Héðni frá Feti. Við teljum að þessi verði grá með tímanum, enda óvenju dökk og með nokkur ljós augnhár. En hvað sem litnum líður er þetta flott folald, með vel settan háls og miklar hreyfingar. 

Hrund verður haldið undir Hákon okkar í sumar (www.hakon.is)

Hátíð frá Úlfsstöðum kastaði í síðustu viku. Hún kom með þriðju hryssuna í röð. Glæsilega, háfætta og framfalleg, rauða hryssu.

Nú er bara spurning um hvort hún verði áfram rauð eða fari að grána. Faðirinn er grár, gæðingurinn Héðinn frá Feti. En okkur finnst líklegt að hún verði rauð áfram. Við eigum þessa Héðinsdóttur, en Helgi vinur okkar á Ragnheiðarstöðum, sem á helminginn í Hátíð með okkur fær næsta folald. Hátíð fór í sæðingar við Álfi frá Selfossi á Sandhólaferju og verður sónarskoðuð í næstu viku. 

Hamborg frá Feti, klárhryssa undan Álaborg og Stíganda, fór í flottan dóm á Sörlastöðum í síðustu viku. En hún var grátlega nærri 1. verðlaunum, 7,99 í aðaleinkunn. Hamborg er hreyfingafalleg hryssa, með mikið framgrip og fótaburð. Hún fékk góðar dómsumsagnir bæði hvað varðar byggingu og hæfileika. Hún er viljug og kraftmikil, með sína hæstu einkunn 9,0 fyrir stökk.

Hún hlaut meðal annars 8,5 fyrir háls/herðar, bak/lend, samræmi og hófa og 8,0 fyrir fótagerð og prúðleika. Í byggingu 8,18. 

Hamborg á Sörlastöðum í síðustu viku.

Þrymur frá Ragnheiðarstöðum er fjögurra vetra foli í okkar eigu ásamt vinum okkar á Ragnheiðarstöðum, Helga og Ella og Viðju í Langholti. Guðmundur Daníelsson fékk Þrym lánaðan í fyrrasumar þar sem hann fyljaði um 12 hryssur. Og árangurinn lætur ekki á sér standa. Gullfalleg folöld komin í heiminn. 

Folöldin eiga það sammerkt að vera myndarleg og litskrúðug, framfalleg og hreyfingagóð.

Klárhryssan snjalla, Hamborg frá Feti, fór í fínan dóm á Sörlastöðum í vikunni. Fékk 8,5 fyrir tölt, brokk, fegurð í reið, vilja og geðslag. Fyrir byggingu hlaut hún 8,18 og 7,94 í aðaleinkunn. Við bíðum spennt eftir yfirlitssýningu, teljum að hún eigi þónokkuð inni.

Hamborg frá Feti, knapi Erlingur Erlingsson

Gasella frá Garðsá, 1. verðlauna hryssa sem við erum með í ræktun kastaði myndarlegum brúnum Álfssyni þann 10. maí síðastliðinn. Það eru þónokkrar væntingar gerðar til þessa fola enda foreldrarnir með úrvalskosti, en ólíka þó. Hann er með BLUP 121.

Það er ekki komið nafn á kappann ennþá. En uppástungurnar eru nokkrar, svo sem...

Gasella og Álfssonurinn.